اسلام آباد : وزیر خارجہ شاہ محمود قریشی آج اقوام متحدہ جنرل اسمبلی میں مسئلہ فلسطین اٹھائیں گے ، وزیر خارجہ کا خطاب پاکستان کے میڈیا پربھی براہ راست نشر کیا جائے گا۔
تفصیلات کے مطابق سفارتی ذرائع کا کہنا ہے کہ اقوام متحدہ جنرل اسمبلی کااجلاس آج نیو یارک میں منعقدہوگا، اجلاس پاکستانی وقت کےمطابق شام7 بجے منعقدہوگا۔
ذرائع کا کہنا تھا کہ اجلاس میں ترکی فلسطین پرحالیہ اسرائیلی جارحیت پرقراردادپیش کرےگا، پاکستان اس قراردادکااسپانسرہو گا، قراردادپرپاکستان اورترکی دیگرممالک کی حمایت کے حصول کیلئے کوشاں ہیں، بیشترممالک نےقراردادپرحمایت کی یقین دہانی کرا دی ہے، جس کے بعد جنرل اسمبلی میں پاکستان اورترکی کی مطلوبہ اکثریت کا حصول متوقع ہے۔
سفارتی ذرائع کے مطابق قراردادمیں 4 نکات پرزوردیاجائےگا، فلسطینیوں کاقتل عام فوری طورپررکوائےجانےکامطالبہ کیاجائےگا، موجودہ صورتحال کو اسرائیلی جارحیت کےطورپرمتعارف کرانےکامطالبہ ہوگا، اسرائیل کےجنگی جرائم پراس کےاحتساب کی بات کی جائے گی اور القدس شریف کے بطور دارلحکومت فلسطینی ریاست پر زور دیا جائے گا۔
ترجمان نے کہا ہے کہ شاہ محمودنیویارک میں جنرل اسمبلی اجلاس میں مسئلہ فلسطین اٹھائیں گے، پاکستان مسئلہ فلسطین سےمتعلق سفارتی کوششیں جاری رکھےہوئےہے ، اسرائیلی افواج کےفضائی حملوں میں فلسطینی بچےاورخواتین شہیدہوئیں۔
شاہ محمودقریشی مختلف ممالک کےوزرائےخارجہ ، جنرل اسمبلی صدرسمیت اہم شخصیات سےملاقاتیں کریں گے جبکہ پاکستانی سفارتخانےمیں منعقدہ کمیونٹی ایونٹ میں شرکت کریں گے اور نیویارک میں مقامی و بین الاقوامی میڈیاکےساتھ گفتگوکریں گے،ذرائع
اس دوران وزیرخارجہ فلسطین صورت حال ، اہم علاقائی و عالمی امورپرپاکستان کا نکتہ نظرپیش کریں گے ، پاکستان نےفلسطین پرحالیہ اسرائیلی جارحیت پر پروایکٹو کردارادا کرنے کا فیصلہ کیا ہے۔
ترجمان دفترخارجہ زاہد حفیظ نے کہا فلسطین پر اسرائیلی جارحیت کےتناظرمیں پاکستان عالمی فورمز پر فرنٹ پرہے، پاکستان اس معاملےپرتمام دستیاب عالمی فورم کوفعال کررہاہے، اوآئی سی کےحالیہ اجلاس میں پاکستان قراردادکاپرائم موورتھا۔
ترجمان کا کہنا تھا کہ سلامتی کونسل اجلاس میں اسلامی ملکوں کےساتھ ملکر کوششیں کی گئیں، امریکا نے سلامتی کونسل اجلاس میں ویٹوکااختیاراستعمال کرلیا، جنرل اسمبلی میں امریکا کے پاس قراردادکوویٹوکرنےکااختیارنہیں ،دفتر خارجہ
زاہد حفیظ نے مزید کہا کہ پاکستان اب جنرل اسمبلی میں فلسطین پرانتہائی اہم کرداراداکررہاہے، اقوام متحدہ جنرل اسمبلی میں دیگراسلامی ملکوں سےموثررابطہ موجودہے، اجلاس میں اسرائیلی جارحیت پرہرپہلوسےغورہوگا۔
